Árið 2017 var viðburðaríkt og lærdómsríkt í fjölbreyttum rekstri OR og dótturfyrirtækjanna. Hér er stiklað á helstu viðburðum.
Verðbreytingar um áramót
Veitur lækka verð á rafmagnsdreifingu um 5,8% og vatnsgjald um 11,2% hjá flestum viðskiptavinum. Ástæðan er hagkvæmari rekstur en meðan á Planinu stóð var fyrirtækið skuldbundið til að halda gjaldskrám í takti við almenna verðlagsþróun.
Nýtt tengivirki á Akranesi
Á Akranesi er fomrlega tekin í notkun ný aðveitustöð rafmagns í eigu Veitna og Landsnets. Með þessu er afhendingaröryggi rafmagns í bænum aukið en áður höfðu Veitur uppfært dreifikerfið í bænum í 11 kílóvolt.
Viðskiptavinir ON ánægðastir
ON fær viðurkenningu Íslensku ánægjuvogarinnar sem raforkusalinn með ánægðustu viðskiptavinina.
Reykjavíkurborg kaupir tvo hitaveitutanka í Öskjuhlíð
Reykjavíkurborg kaupir tvo af sex vatnsgeymum hitaveitu Veitna á Öskjuhlíð fyrir náttúrulífssýningu og gefur fyrirheit fyrir byggingu tveggja nýrra og stærri geyma neðar í hlíðinni.
ON-Hleðslu appið komið út
ON kynnir smáforritið ON Hleðslu sem sýnir rafbílaeigendum hvar hlöður fyrirtækisins eru og í rauntíma hvort þær eru til reiðu.
Planið gekk upp
Planið gekk upp segir OR um leið og ársreikningur ársins 2016 liggur fyrir. Árangur aðgerðaáætlunarinnar varð tæpum níu milljörðum króna umfram markmið.
Starfsfólk safnaði fyrir vatnsveitu í Sýrlandi
Starfsfólk Veitna afhendir UNICEF afrakstur fjársöfnunar meðal starfsfólks fyrir vatnsveitu í stríðshrjáðri Aleppo í Sýrlandi.
Framtíðin er hafin - opinn ársfundur OR 2017
Loftslagsmál eru í brennidepli á opnum ársfundi OR.
Magnea hjá ON fær umhverfisverðlaun Ölfuss 2017
Magnea Magnúsdóttir, umhverfis- og landgræðslustjóri Orku náttúrunnar, fær Umhverfisverðlaun Ölfuss 2017 fyrir brautryðjendaverkefni við uppgræðslu á Hellisheiði.
Besti innri vefur Íslands
Þjónustuvefur Ljósleiðarans er valinn besti innri vefur ársins af Samtökum vefiðnaðarins.
Mest áhrif kvenna hjá OR
Áhrif kvenna eru langmest innan samstæðu OR meðal fyrirtækja í orkugeiranum samkvæmt úttekt sem Félag kvenna í orkumálum gengst fyrir.
Leiðin milli Akureyrar og Reykjavíkur opnuð
ON opnar þrjár nýjar hlöður fyrir rafbíla á leiðinni milli Akureyrar og Reykjavíkur og umhverfisráðherra lýsir þessa fjölförnu þjóðleið opna rafbílum.
Ráðlagt að skola seti úr farvegi Andakílsár
Mistök eru gerð þegar hleypt er úr inntakslóni Andakílsárvirkjunar og mikill aur berst í farveg árinnar. Brugðist er við með hreinsun og fleiri aðgerðum í samráði við heimamenn og vísindafólk auk endurskoðunar verklags.
Boranir með rafmagni spara meira en milljón lítra af olíu
ON semur við Jarðboranir um gufuborun á Hengilssvæðinu. Öll borun verður knúin með rafmagni sem minnkar kolefnisspor verkefnanna umtalsvert.
Nýir spennar í aðveitustöð A1 við Barónsstíg
Veitur koma nýjum öflugri spennum fyrir í aðveitustöðinni við Barónsstíg. Afl stöðvarinnar er með þessum næstum tvöfaldað en þétting byggðar í miðborginni kallar á aukin afköst rafdreifikerfisins.
Upprunavottað rafmagn frá Orku náttúrunnar
ON tilkynnir að frá 1. janúar 2017 fylgi upprunavottorð allri raforkusölu fyrirtækisins á almennum markaði.
Landgræðsluhópur ON græðir upp mosakrot
Landgræðsluhópur ON græðir upp krot í mosa í Svínahlíð í Grafningi með aðferð sem vekur mikla athygli og síðar kennd á námskeiðum fyrir fagfólk og almenning.
„Dreginn verður lærdómur af málinu og verklagi breytt“
Veitur tilkynna á blaðamannafundi um breytt verklag við viðhald fráveitumannvirkja og upplýsingagjöf í tengslum það. Tilefnið er óánægja með frammistöðu í þessum efnum þegar viðhald dælustöðvar við Faxaskjól dróst á langinn með tilheyrandi fjörumengun.
Vesturhús höfuðstöðva OR illa farið
Á blaðamannafundi greinir forstjóri OR frá alvarlegum rakaskemmdum á hluta húseignanna við Bæjarháls og kynnir hugsanlegar leiðir til úrbóta.
Risastyrkir til loftslagsverkefna
OR, HÍ og fjöldi samstarfsaðila víða um heim fá samtals um 1,5 milljarða króna styrk frá Evrópusambandinu til loftslagsverkefnanna við hellisheiðarvirkjun.
ON og N1 opna hlöðu fyrir rafbíla á Hvolsvelli
Föstudaginn 15. september opnaði Orka náttúrunnar hlöðu með hraðhleðslu fyrir rafbíla við þjónustustöð N1 á Hvolsvelli.
OR samstæðan og Verkís fá samgönguviðurkenningu
OR samstæðan er annað tveggja fyrirtækja sem hlýtur samgönguviðurkenningu Reykjavíkurborgar fyrir markvissar aðgerðir til að stuðla að umhverfisvænni samgöngum.
Hlöður opnaðar í Vík og á Kirkjubæjarklaustri
ON opnar hlöður fyrir rafbíla í Vík í Mýrdal og á Kirkjubæjarklaustri.
Nýr áfangi í kolefnisbindingu við Hellisheiðarvirkjun
Nýtt skref er stigið í kolefnisbindingu við Hellisheiðarvirkjun með samstarfi við Climeworks, sem fangar koltvíoxíð úr andrúmslofti og nýtir búnað Hellisheiðarvirikjunar til að binda það í jörðu. Margir útbreiddustu fjölmiðlar heims fjalla um framtakið.
Gagnaveita Reykjavíkur hlýtur tvenn alþjóðleg verðlaun
Gagnaveita Reykjavíkur hlýtur tvenn verðlaun á stærstu háhraðaráðstefnu heims, Broadband World Forum; bestu nýmælin í þjónustu og Erling Freyr framkvæmdastjóri er valinn háhraðamaður ársins.
Verð á rafmagnsdreifingu lækkar um 7,5%
Verð á rafmagnsdreifingu Veitna lækkar um 7,5%. Þetta er önnur lækkunin á árinu.
Fjölmenni á málþingi um hitaveitu
OR heldur fjölsótt málþing til heiðurs Jóhannesi Zoëga fyrrverandi hitaveitustjóra sem hefði orðið 100 ára á árinu.
Breyttur vinnutími - stórt skref í jafnréttismálum
Stórt skref er stigið í jafnréttismálum þegar daglegur vinnutími í viðhaldsþjónustu Veitna og götuljósaflokkum ON var styttur með það fyrir augum að gera starfsfólkinu, sem flest er karlar, kleift að taka þátt í heimilisstörfum í morgunsárið.
OR eignist Bæjarháls 1 að nýju
Eigendur Foss fasteignafélags taka tilboði OR í öll hlutabréf félagsins og þar með fær OR aftur full umráð yfir húseignunum við Bæjarháls 1.
Ný hreinsistöð skólps á Kjalarnesi
Veitur taka í notkun nýja hreinsistöð fráveitu á Kjalarnesi að viðstöddum borgarstjóra og fjölda gesta. Með þessu lýkur því risavaxanda verkefni sem hófst árið 1995 að hreinsa strendur borgarinnar.
Fjórar nýjar hlöður, sala hefst 1. febrúar
ON segir frá því að hlöðurnar fyrir rafbíla verði orðnar hátt í 50 fyrir árslok 2018 og að sala á hraðhleðslum hefjist 1. febrúar 2018.